Patrick Süskind, o autor desta novela, naceu en 1949 en Ambach (Alemaña). Após os seus estudos de Historia traballou como guionista televisivo para series da televisión alemá.
Aínda que a súa primeira obra literaria foi O contrabaixo, unha peza teatral que se estreou en Múnic e chegou ás 500 representacións, a sona internacional chegoulle c’O Perfume, publicada en 1985 e que foi traducida a máis de 40 linguas.
O protagonista da historia é Jean-Baptiste Grenouille, un aprendiz de perfumista nacido sen cheiro corporal, mais posuidor dun extraordinario sentido do olfacto.
Un día Grenouille encontra unha moza cun perfume totalmente diferente de todos os outros millares de perfumes que gardaba na memoria, e acabará por matala, coas súas propias mans, de tanto desexar apoderarse do seu cheiro. Mais, esta moza é apenas unha das moitas xoves que o protagonista acaba por matar (26 no total), en busca do perfume perfecto.
A novela explora a relación entre os cheiros e as emocións que poden evocar. É unha novela sobre a identidade e a moralidade humanas.
O martes pasado, como estamos moi atarefados coa lectura de Jane Eyre, dedicámolo á lectura de poemas do libro de Uxío NovoneyraOs Eidos. Gustamos moito del e animámosvos a lelo e logo vistar o Courel, esa zona de Galicia tan fermosa.
Para que vos animedes de verdade aí van dous exemplos que nos encantaron:
Canta a fontiña
canta a fontela
i anque a canción é dela
ten unha cousa miña
pola que podo entendela.
Cara Monforte de Lemos
montes con mendos de pan
Cara o Incio como navíos
nebras brancas de vagar
Charlotte Brontë (pronuncia “bronti”) foi a maior das cinco irmás Brontë. As tres que chegaron á vida adulta foron escritoras pero publicaron as súas obras baixo pseudónimo; Charlotte como Currer Bell.
A súa vida en Haworth (condado de Yorkshire) serviulle de inspiración para a súa obra literaria, na que, o mesmo que a súa irmá Emily, incorpora elementos paisaxísticos desta rexión inglesa. Jane Eyre (pronuncia “ea”) publicouse en 1847 co título Jane Eyre. An Autobiography. Esta novela, adiantada ao seu tempo polo seu carácter protofeminista, mestura varios xéneros: é unha novela de formación (como David Copperfield e Great Expectations de Dickens) pero é tamén unha novela de crítica social (cunha fonda reflexión moral sobre os costumes da época vitoriana) e incorpora elementos da novela gótica.
Unha das innovacións de Wuthering Heights é a inclusión da paisaxe na novela. A paisaxe de Wuthering Heights está inspirada nos páramos dos arredores de Haworth (condado de Yorkshire), onde a autora viviu gran parte da súa vida.
Neste enlace podes ver fotografías desta paisaxe. Ao longo da novela hai moitas descricións que lembran paisaxes actuais nesta área.
Debaixo podes ver unha recreación da zona en forma de mapa, coa localización das dúas casas onde transcorre a maior parte da acción.
Mapa de localización das casas importantes na novela
A casa onde naceu Catherine Earnshow e onde vive Heathcliff, a que dá título á novela, está situada no páramo, e o seu nome contén unha palabra dialectal da zona (Wuthering Heights poderíase traducir como «outeiros ventosos» ou «outeiros agrestes»). Debaixo podes ver uhna recreación da casa de labranza tomada desta páxina, onde podes ver tamén planos do interior.
Moi bo ano a todas as lectoras e a todos os lectores. Perdoade a tardanza, aínda que aquí estamos de novo para darvos algunha información que a bo seguro ilustrará as vosas lecturas de Nadal, que como xa sabemos foron as novelas das irmás Charlotte e Emily Brontë.
A época na que viviron as dúas irmás recibe o nome de Época ou Era Vitoriana polo reinado da Raíña Vitoriade Inglaterra. O reinado desta muller é moi duradeiro (1837-1901) e caracterízase por ser a etapa máis longa e próspera da Inglaterra moderna.
A raíña Vitoria I
No dilatado lapso de tempo que conforma o reinado de Vitoria I, a Grande Bretaña consolidarase como potencia económica e imperial e producirase un desenvolvemento da economía e da industria. A sociedade pasará definitivamente dun réxime agrario e rural a unha economía industrial e urbana, o que traerá consigo a consolidación da burguesía como clase social dominante. Todo isto asociarase a unha conciencia de nación poderosa e a unha grande confianza nas propias posibilidades e na cultura e os costumes do imperio.
Trátase dunha época profundamente conservadora marcada pola relixiosidade extrema e a preocupación pola orde e os bos costumes. Existe unha ríxida moral que leva a ocultar os vicios da sociedade e os impulsos amorosos e sexuais.
As novelas Outeiros ventosos e Jane Eyre, ambas publicadas en 1847, en plena era vitoriana, son un bo reflexo da época, pois poñen de manifesto as paixóns e sentimentos que se agochan baixo a fachada dunha sociedade opulenta e satisfeita de si mesma.
O pasado martes día 29 de novembro rematamos a primeira xeira de reunións do clube de lectura co coloquio sobre o Diario de Anne Frank. Foi unha reunión moi interesante onde os lectores e lectoras mostramos as nosas opinións sobre esta fascinante rapaza, as súas dotes como escritora, a súa densa personalidade e as circustancias historicas que lle tocou vivir.
Como os exames abundan estes días e as vacacións de Nadal se achegan, decidimos reanudar as reunións en xaneiro. Pero, naturalmente, novas lecturas para ter dispostas nesas datas. As obras que vós mesmas/os decidistes ler son:
Outeiros ventosos
O título en galego poderiamos traducilo como Outeiros ventosos, aínda que seguro que vos soe máis a tradución castelá: Cumbres borrascosas. Por certo, para cando unha tradución ao galego? Aproveitamos o noso humilide blog para reivindicar a presenza desta grande novela na nosa lingua, na que, aínda que contamos xa con unha longa lista de títulos da literatura universal traducidos, aínda non temos ningunha das obras das irmás Brontë. Esperemos que isto se solucione canto antes.
A obra de Emily Brontë é unha gran novela romántica, de amores arrebatados e cun ambiente misterioso excepcionalmente deseñado. Non en van moitos autores a consideran influída pola novela gótica e de terror anglosaxoa. É unha obra moi popular, especialmente entre a xuventude de todas as épocas, ata o punto de que aos lectores da serie Crepúsculo vos será familiar por ser a lectura preferida da protagonista, Bella Swan.
Jane Eyre
E a outra novela elixida é Jane Eyre, da maior das irmás escritoras Brontë, Charlotte. Non é que quixeramos facer un monográfico sobre as irmás escritoras (e aínda nos faltaría unha, a menor, Anne Brontë) senón que non sabiamos por cal das dúas excelentes obras decantarnos.
Jane Eyre é o cume da novela romántica e narra a historia dunha moza orfa que vai traballar como institutriz da filla do propietario dunha misteriosa mansión. O amor xurdirá pero a protagonista sabe que se oculta un grande secreto nesa casa.
Tanto de Jane Eyre como de Outeiros ventosos se fixeron numerosas adaptacións cinematográficas. Así que, mellor logo de ler os libros, poderedes contemplar tamén as historias en imaxes. Boa lectura.
Na primeira sesión dedicada a Ollos de auga de Domingo Villar consultamos unha estupenda guía fotográfica polos lugares que se mencionan na novela. Ademais vimos un vídeo no que o escritor e membro do equipo da editorial Galaxia, Francisco Castro, entrevistaba a Domingo Villar. Para completar este, aquí vos poñemos outra interesante entrevista con el, pero esta realizada no IES de Porto do Son por parte dos alumnos do centro con motivo dunha visita do autor.
E para que non o esquezades, aquí vos vai o vídeo que vimos na sesión dedicada ao diario no que se mostra unha visita virtual ao espazo no que viviron as dúas familias durante dous anos. Estremecedor.
E xa para rematar, queremos agradecer a visita do profesor de Xeografía e Historia do instituto, Xoán Santaló. Acudiu para falarnos do período nazi e ademais veu acompañado do seu fillo Carlos, exalumno do centro e unha auténtica enciclopedia de coñecementos históricos! Grazas.
Na primeira reunión do Club de lectura acordouse, despois de un animado debate, comezar con dúas obras:
Ollos de auga
A novela Ollos de auga, de Domingo Villar foi hai uns anos un auténtico éxito editorial que logo continuou co seu segundo libro, A praia dos afogados.
Trátase de novela negra, literatura trepidante que engaiola ao lector e que non o deixa ata o remate. Asistimos a un horrendo crime e á correspondente investigación por parte da parella de protagonistas. Por suposto, o que irán descubrindo será sorprendente e irá desvelando unha realidade moito máis complexa da que nos imaxinamos.
E, por suposto, non hai que esquecer o marco onde se desenvolve toda a acción: unha cidade de Vigo marabillosamente retratada nos seus máis diversos ambientes. Seguro que cando completedes a lectura da obra quereredes perdervos polas rúas desa estupenda cidade e visitar os recantos polos que deambula o inspector Leo Caldas.
Un segundo grupo de lectoras optou por un auténtico clásico, un dos libros máis lidos da historia:
A portada da edición alemana do Diario
Nin máis nin menos que o Diario de Anne Frank. Que dicir dunha obra tan estarrecedora e tenra á vez. Lectura obrigada para todo ser humano nalgún momento da súa vida é un testemuño real da tolemia nazi que aínda palpita por veces na sociedade. Son as impresións dunha mociña que aínda está deixando a infancia e se vai internando no mundo adulto dun xeito terrible: mediante a reclusión no que hoxe chamariamos un zulo. Por que? Para fuxir do horror dos campos de concentración.
O demais deberedes descubrilo por vós mesmos/as. Agardamos os vosos comentarios!
clubgaleano 